ვაქცინაცია საქართველოში და სხვა ქვეყნებშიც გარკვეული სირთულეებით დაიწყო, თუმცა არის მოლოდინი, რომ ეს პროცესი მნიშვნელოვნად დაჩქარდება – ამის შესახებ ფინანსთა მინისტრმა ლაშა ხუციშვილმა ისაუბრა.
მისი თქმით ასევე ლარის კურსის მოლოდინები დამოკიდებულია ფულად გადმორიცხვებზე, ტურიზმზე, ექსპორტსა და პანდემიის მართვაზე.
„კურსთან მიმართებაში რამდენიმე ფაქტორია, რომელზეც დამოკიდებულია, რა მოლოდინები უნდა იყოს. პირველ რიგში, ეს არის ფუნდამენტური და მაკროეკონომიკური ფაქტორები – ფულადი გადმორიცხვები, რომელიც საკმაოდ გაზრდილია, ექსპორტი, რომელიც გასულ თვეს საკმაოდ გაიზარდა, ტურიზმის მიმართულება, რომელიც გარკვეულწილად პანდემიის მართვაზეა დამოკიდებული.
ამ დროს ყველაზე მნიშვნელოვანი ვაქცინაციის პროცესია. ვაქცინაცია საქართველოში და სხვა ქვეყნებშიც გარკვეული სირთულეებით დაიწყო, თუმცა არის მოლოდინი, რომ ეს პროცესი მნიშვნელოვნად დაჩქარდება, რაც დღეს ერთ-ერთი განმსაზღვრელი ფაქტორია ეკონომიკის გახსნის და ტურიზმის ნაწილობრივ აღდგენის. ყველა ეს ფაქტორი ჯამში გვაძლევს იმის მტკიცების შესაძლებლობას, რომ ლარის მკვეთრი მერყეობა ამ პერიოდში არ უნდა გვქონდეს.
როდესაც საუბარია ინტერვენციაზე, აქ მნიშვნელოვანია, რომ სებ-ს წინასწარ აქვს გაცხადებული სტრატეგია, რომელსაც მიჰყვება და აქვს გათვლები, რა ოდენობით შეიძლება იყოს საჭირო ასეთი ტიპის ინტერვენცია. შესაბამისად, ეს არ ხდება იმისთვის, რომ კონკრეტულ პერიოდში ლარის კურსის კორექტირება განხორციელდეს. ეს არის იმის ნაწილი, რაც გულისხმობს ინფლაციის ტარგეტირებას და ასევე მკვეთრი რყევებიდან თავის არიდებას“- განაცხადა ფინანსთა მინისტრმა