საქართველოს თავდაცვის მინისტრმა თავდაცვის ძალებისა და დიპლომატიური კორპუსის წარმომადგენლებს თავდაცვის ძალების 2020-2030 წლის სამოქმედო გეგმა წარუდგინა. ჯუანშერ ბურჭულაძის განცხადებით, ათწლიანი სამოქმედო გეგმა თავდაცვის ძალების გაძლიერებას ისახავს მიზნად და იმ ნაბიჯების ერთობლიობას წარმოადგენს, რომელთა განხორციელება საქართველოს თავდაცვის ძალებს სრულიად ახალ საფეხურზე გადაიყვანს: „ქართული ჯარი ჩვენი ქვეყნის სუვერენიტეტის, უსაფრთხოებისა და თავისუფლების დაცვის უმნიშვნელოვანესი გარანტია და შესაბამისად, მისი გაძლიერება ქართული სახელმწიფოს ეროვნული ამოცანაა“, – განაცხადა ჯუანშერ ბურჭულაძემ.
მინისტრმა კრწანისში, საერთო საჯარისო ცენტრის ტერიტორიაზე შეკრებილ სტუმრებს თავდაცვის სამინისტროს საშუალო და მოკლევადიანი დაგეგმვის დოკუმენტების, თავდაცვის სტრატეგიული მიმოხილვისა (SDR) და მინისტრის დირექტივების პრიორიტეტებიც გააცნო. როგორც მან აღნიშნა, უწყების სამოქმედო გეგმით განსაზღვრული პრიორიტეტები თანხვედრაშია გამოწვევებთან, რომლის წინაშეც დღეს თავდაცვის ძალები დგას. მოკლე და საშუალოვადიანი დაგეგმვის პროცესიდან (2021-დან 2025 წლამდე) გრძელვადიანი დაგეგმვის პროცესზე გადასვლა კი, თავდაცვის უწყების განვითარების უწყვეტობას, რესურსების გამოყენების გრძელვადიან პერსპექტივაში დაგეგმვასა და არსებული რესურსების უფრო რაციონალურ ათვისებას უზრუნველყოფს. ჯუანშერ ბურჭულაძის განცხადებით, თავდაცვის სამინისტროს მომავალი ხედვა ლოკალური, რეგიონული და გლობალური უსაფრთხოების ძირითადი გამოწვევების ანალიზს ეფუძნება, რასაც ეროვნული დონის „საფრთხეების შეფასების დოკუმენტი“ განსაზღვრავს.
თავდაცვის უწყების გრძელვადიანი გეგმის პრეზენტაციაზე მინისტრმა მოწვეულ სტუმრებს ინფორმაცია მიაწოდა თავდაცვის ძალების განვითარების ძირითად პროექტებსა და საბრძოლო შესაძლებლობების გაძლიერების მიზნით გადასადგმელ ნაბიჯებზე – უსაფრთხოების გამოწვევებთან გამკლავების გზები, შეიარაღებისა და ტექნიკის განახლება, საჰაერო, სადაზვერვო და საარტილერიო შესაძლებლობების გაძლიერება, ნატოს სტანდარტებთან კიდევ უფრო დაახლოება, ინფრასტრუქტურისა და სოციალური პირობების გაუმჯობესება, ამოცანით მართვა და მცირე ქვედანაყოფების მოქმედების ტაქტიკა და სხვა.
თავდაცვის უწყების ათწლიანი სამოქმედო გეგმის წარდგენისას მინისტრმა მნიშვნელოვანი ადგილი დაუთმო უსაფრთხოების გამოწვევებს. ჯუანშერ ბურჭულაძის ინფორმაციით, თავდაცვის სამინისტროს მომავალი ხედვა ლოკალური, რეგიონული და გლობალური უსაფრთხოების ძირითადი გამოწვევების ანალიზს ეფუძნება, რასაც ეროვნული დონის „საფრთხეების შეფასების დოკუმენტი“ განსაზღვრავს.
მინისტრმა უსაფრთხოების სფეროში ჩვენი ქვეყნისა და თავდაცვის ძალების მთავარ გამოწვევად რუსეთის ფედერაციიდან მომდინარე საფრთხეები, რუსეთის სამხედრო შესაძლებლობები დაასახელა, რეგიონული და გლობალური მასშტაბით არსებული გამოწვევებიც მიმოიხილა და განმარტა, რომ ამ ფონზე თავდაცვის სამინისტროს მიდგომები გამოწვევებთან ადაპტირებას, საკუთარი თავდაცვის პოლიტიკის არსებულ მოცემულობასთან მისადაგებას ეფუძნება.
მინისტრმა ერთ-ერთ პრიორიტეტულ მიდგომად ტოტალური თავდაცვის პრინციპი დაასახელა: „ტოტალური თავდაცვა სამხედრო თავდაცვას, სამოქალაქო თავდაცვასა და საერთაშორისო თანამშრომლობას მოიცავს. ტოტალური თავდაცვის ეფექტურად განხორციელების შემთხვევაში, სამხედრო აგრესიაზე პასუხის ხანგრძლივობა გაიზრდება და მოწინააღმდეგეს არ ექნება ოკუპაციის განხორციელების საშუალება. „თავდაცვის ძალების სამოქმედო გეგმა 2030“-ის მიზანია, შევქმნათ ჩვენი ჯარის თანმიმდევრული და უწყვეტი განვითარების წინაპირობა, რათა მივიღოთ მაღალი საბრძოლო შესაძლებლობების მობილური ძალა, რომელსაც ექნება უნარი ეფექტურად გაუმკლავდეს ჩვენი სახელმწიფოს წინაშე მდგარ გამოწვევებს და ამავდროულად, მნიშვნელოვანი წვლილი შეიტანოს გლობალური უსაფრთხოების უზრუნველყოფაში“.