გიორგი გახარიამ დღეს მედიის კითხვებს ოზურგეთში ახალი ოფისის გახსნის შემდგომ უპასუხა. მედიამ პარტიის ლიდერს მხარდამჭერების მიერ მიწოდებულ ინფორმაციაზე სთხოვა კომენტირება, რომ მხარდაჭერის გამოსახატად მოქალაქეებს ადგილზე სუსის წარმომადგენლები ხვდებიან, რომლებიც მათ უთვალთვალებენ, ფოტოებს უღებენ და ზეწოლასა და შევიწროებას ეწევიან.
„სამწუხაროდ ეს დიდი იმედგაცრუებაა“ – ასე აფასებს გიორგი გახარია მმართველი ძალის მიერ პარტია „საქართველოსთვის“ მხარდამჭერების დევნისა და შევიწროების სურვილის დემონსტრირებას.
„მე ბევრ ადამიანს ვხვდები, სხვათა შორის ოცნების დამფუძნებლებს , ოცნების ყოფილ წევრებს, რომლებიც ამბობენ, რომ რაც 2012 წელს ხდებოდა, ზუსტად იმავეს იმეორებს დღეს დღევანელი პარტიული ბოსების მიერ მართული ხელისუფლება. რატომ – უბრალოდ ეს შიშია. იცით როგორ დონემდე მიდიან – რიგით საჯარო მოხელეებს – სოფლის ექიმს, მეხანძრეს, უბრალო ადამიანებს, რომლებსაც მინიმალური ხელფასი აქვთ – იმის გამო , რომ ფეისბუქზე რაღაცა სიმპატია გამოხატეს მიდიან და ემუქრებიან სამსახურიდან გაგდებით ან მათი ოჯახის წევრების სამსახურიდან გაგდებით. ამორალურია ეს ყველაფერი, ამას საერთოდ არანაირი კავშირი ღირსებასთან არ აქვს და ოცნება, რომელიც 2012 წელს ხელისუფლებაში მოვიდა სამართლიანობის და ღირსების აღდგენის ძირითადი ლოზუნგით და მოტივით…სამწუხაროა და უდიდესი იმედგაცრუებაა ჩემთვისაც, რომ დღეს იმ მდგომარეობაშია ამ პარტიული ბოსების მართვის შედეგად, რომ იძულებულია იგივე ინსტრუმენტები გამოიყენოს და ზუსტად იგივე მეთოდი.“ – ამბობს გახარია.