თავდაცვის მინისტრმა ჯუანშერ ბურჭულაძემ დღეს პარლამენტში მინისტრის საათის ფარგლებში ისაუბრა. სწორედ საკანონმდებლო ორგანოში ყოფნისას განაცხადა, რომ საქართველო უპილოტო საფრენი აპარატების წარმოებას გეგმავს.
მინისტრმა სიტყვით გამოსვლაში თავდაპირველად ყურადღება რუსეთის აგრესიულ პოლიტიკაზე გაამახვილა, რომელიც მიმართულია იქითკენ, რომ მოხდეს სიტუაციის ესკალაცია რეგიონში. სწორედ ამ კუთხით, მან ხაზი გაუსვა სამთავრობო პროგრამას, რომელიც ტოტალურ თავდაცვას გულისხმობს. ამ კუთხით ჯუანშერ ბურჭულაძემ პარტნიორებთან გაფორმებულ ხელშეკრულებებზე ისაუბრა, კერძოდ საფრანგეთთან, რომელიც წლის ბოლომდე საქართველოს ახალ ტექნიკას გადმოსცემს.
მინისტრმა ასევე ისაუბრა იმასთან დაკავშირებით, რომ წლის ბოლომდე ასევე ამოქმედდება ქართულ-ებრაული ცენტრი, რომელიც M4-ის ტიპის ავტომატური ცეცხლსასროლი იარაღების წარმოებას დაიწყებს.