იმ აპლიკანტებს, რომლებსაც გამოცდების მიმდინარეობისას კორონავირუსი დაუდასუტრდებათ 2021 წელს ეროვნულ გამოცდების პროცესს არ გამოეთიშებიან – ამის შესახებ განათლებისა და მეცნიერების მინისტრის მოადგილემ, ნუნუ მიცკევიჩმა განაცხადა.
საგამოცდო პროცესს არ გამოეთიშებიან ის აპლიკანტები, რომლებსაც გამოცდების მიმდინარეობისას ვირუსი დაუდასტურდებათ – პირებს, რომლებსაც საგამოცდო პერიოდში გამოუვლინდებათ კოვიდ-19, შეფასებისა და გამოცდების ეროვნული ცენტრი საგანგებოდ შედგენილი ცხრილის მიხედვით გამოცდას შესაბამის საგანში ჩაუტარებს არაუადრეს 2 კვირისა. მნიშვნელოვანია, რომ გათვალისწინებული იქნება გეოგრაფიული დაფარვა – აღინიშნავს სამინისტრო.
ნუნუ მიცკევიჩის განმარტებით, პირებს, რომლებსაც საგამოცდო პერიოდში დაუდასტურდებათ ვირუსი საგანგებოდ შედგენილი ცხრილის მიხედვით, შესაბამის საგანში გამოცდას არაუადრეს 2 კვირისა ჩააბარებენ.
შეფასებისა და გამოცდების ეროვნული ცენტრის ხელმძღვანელის, სოფო გორგოძის თქმით, წელსაც მოეწყობა საკარანტინე სივრცეები იმ გამოსაცდელებისათვის, რომელთაც აღენიშნებათ ტემპერატურა 37°С და მეტი, მაგრამ არ აქვთ დადასტურებული COVID-19.
სამინისტრო შემდეგ რეკომენდაციებს ავრცელებს:
- გამოსაცდელთა და მეთვალყურეთა დაშვება მოხდება მხოლოდ ყოველი საგამოცდო სექტორის ფართობის 50%-ზე.
- თითოეული სამუშაო მაგიდა წინა მხრიდან აღჭურვილი იქნება გამჭვირვალე დამცავი ფარით/ბარიერით;
- მაგიდებს შორის დაშორება იქნება მინიმუმ 2 მეტრი, ერთმანეთის მიმდევრობით განლაგებულ მაგიდებს შორის მანძილი კი – 1 მეტრი.
- კონდიციონერები ირთვება 30° გრადუსზე მაღალი ტემპერატურის პირობებში.
- პირბადის ტარების წესი გავრცელდება საგამოცდო პროცესში მონაწილე ყველა პირისთვის.